Gin-anunsyo sang Holy See Press Office nga patigayunon ang funeral mass ni Pope Francis sa Sabado, Abril 26, las-dies sa aga sa St. Peter’s Square.
Pangunahan ni Cardinal Giovanni Battista Re, Dean sang College of Cardinals, ang misa nga iga-concelebrate man sang mga Patriarchs, Cardinals, Archbishops, Bishops, kag mga pari gikan sa nagkalain- lain nga parte sang kalibutan.
Ang Eucharistic celebration ang tapuson paagi sa Ultima commendatio kag Valedictio, nga nagamarka naman sang pagsugod sang Novemdiales ukon nine days of mourning kag Masses para sa katawhayan sang kalag ni Pope Francis.
Sunod nga dal-on ang lawas sang Pope sa St. Peter’s Basilica kag dal-on sa Basilica of St. Mary Major para ilubong.
Subong nga Mierkules, ang lungon nga nagaunod sang lawas sang Pope ang dal-on halin sa chapel sang Casa Santa Marta pakadto sa St. Peter’s Basilica, agud nga makaduaw ang mga tumuluo.
Maga-preside sa seremonya si Cardinal Kevin Farrell, Camerlengo sang Holy Roman Church, nga magasugod las-nuebe sang aga, oras sa Vatican.
Ang prusisyon magalabay sa Santa Marta Square kag Square of the Roman Protomartyrs.
Ini ang magagwa sa Arch of the Bells pasulod sa St. Peter’s Square kag magasulod naman sa Vatican Basilica paagi sa central door.
Sa Altar of the Confession, maga-preside si Cardinal Camerlengo sa Liturgy of the Word, kag pagasundan naman sang pagbisita sang publiko sa lawas sang santo papa.
Magapabilin nga bukas ang St Peter’s Basilica sa mga tumuluo nga maghatag sang ila ulihi nga pagtahod kay Pope Francis sa St. Peter’s Basilica umpisa subong nga Mierkules tubtob sa Biyernes.
