Naplastar na sang bahin sang kapulisan ang security measures nga ipatuman may kaangtanan sa pag-umpisa buwas, Pebrero 8, sang 90-day campaign period para sa national candidates sa 2022 elections.
Suno kay Police Regional Office (PRO) VI Spokesperson Pol. Lt. Col. Arnel Solis, may assistance nga i-provide ang mga pulis kun may yara sang campaign activity apang dapat nga may distansya lang halin sa mismo area nga may aktibidad agud nga malikawan nga madagtaan sang kolor ukon maangot ang pulis sa isa ka political party.
Pwede nga mapatigayon sang pulis ang advance party ilabi na kun delikado ang lugar nga kadtuan sang mga kandidato, apang sandig sa pagsulundan sang Commission on Elections (Comelec), wala ginapahanugutan ang convoy agud ‘indi mahatagan sang kolor’ ang mga pulis.
Apang suno kay Solis, kun may approval lang ukon abiso halin sa Comelec, handa gid ang mga pulis nga mag-provide sang dugang nga security para sa mga kandidato kag sa ila nga mga supporters.
Wala pa sang gina-uyatan nga schedule ang PRO VI kun ano nga political group ukon sin-o man nga kandidato ang may himuon nga aktibidad sa rehiyon subong nga semana.
Sandig sa pagsulundan, kinahanglan anay nga mag-secure sang permit halin sa Comelec antes ang pagpatigayon sang political campaign. ##
