Nagpaguwa sang statement ang Group of Seven (G7) nga nagasaad sang mabaskog nga pagpamatok sa mga tuyo sang China nga balabagan ang freedom of navigation sa West Philippine Sea.
Kaangot ini sa ginahimo sang Beijing nga mga militarisasyon kag iligal nga mga aktibidad.
Sa ila statement, ginsulit sang mga lider sa G7 ang ila nga commitment sa hilway, bukas, kag malinong nga Indo-Pacific region nga nakaangkla sa pagtahod sa rule of law kag soberanya.
Kasunod sang ginpatigayon nga Munich Security Conference, ginsiling man sang G7 foreign ministers nga ginabalabagan nila ang paggamit sang puwersa sa tuyo nga ilisan ang status quo. Importante suno sa mga ministro nga mahitso ang mga indi paghangpanay sa malinong nga paagi.
“The G7 members reiterated their commitment to a free, open and secure Indo-Pacific region, grounded in respect for the rule of law and sovereignty. They strongly opposed any attempts to change unilaterally the status quo using force and underscored the importance of resolving disputes peacefully. They strongly opposed China’s attempts to restrict freedom of navigation through militarization and coercive activities in the South China Sea,” kabahin sang statement.
Sang Nobyembre, matandaan nga nagpaguwa man sang pahayag ang G7 nga natublag sila sa pagpadayon sang China sa delikado nga mga aktwasyon kag pagpangbomba sang water cannon batok sa mga barko sang Vietnam kag Pilipinas.
Ang G7 amo ang intergovernmental political kag economic forum nga ginabug-usan sang Canada, France, Germany, Italy, Japan, the United Kingdom, the United States, kag may yara man sang high representative sang European Union (EU).
