Pagaestoryahan pa sang mga miyembro sang gabinete ni President Ferdinand Marcos Jr. ang posibilidad sang pagsapubliko sang ila Statement of Assets, Liabilities, and Net Worth (SALN).
Ginpahayag ni Palace Press Officer Undersecretary Atty. Claire Castro nga magasapol pa ang Marcos Cabinet agud desisyunan kun sundon man nila ang kaangay nga ginhimo sang nagligad nga administrasyon.
Suno kay Castro, ginalantaw pa sang Palasyo ang nagakaigo nga tikang may kaangtanan sa pagsapubliko man sang SALN sang Presidente.
Matandaan nga sang Oktubre 15, ginsiling mismo ni Marcos nga ma-access ang iya SALN sang bisan sin-o nga nagakinahanglan sini, lakip na ang Independent Commission for Infrastructure (ICI).
Samtang, sang damlag lang, nagpagwa sang memorandum circular si Ombudsman Jesus Crispin Remulla nga nagahatag sang access sa publiko sa SALN sang mga opisyal sang gobyerno.
Suno sa nasambit nga polisa, indi na kinahanglan ang permiso sang tag-iya sang SALN para maisapubliko ini, apang magapadayon nga protektado ang pila ka personal nga impormasyon.
Ang bag-o nga pagsulundan nga ini ang kabaliktaran sang memo sang 2020 nga ginpagwa sang anay Ombudsman nga si Samuel Martires.
