Ginbasura sang korte ang gahom sang search warrants nga ginserbe sang Police Regional Office 6 (PRO-6) kag Criminal Investigation and Detection Group (CIDG) sa kontrobersyal nga raid sa Tapaz, Capiz kag Calinog, Iloilo.
Matandaan nga sa amo nga simultaneous joint operations, siyam ka mga residente ang napatay bangud ginaalegar nagbato sa otoridad sang ginserbe ang search warrants.
Apang ginpanindugan sang pamilya sang mga nagtaliwan nga ginpwersa nga sudlon ang ila nga mga balay kag wala sila nagbato.
Sa interview sang Bombo Radyo kay Msgr. Meliton Oso, director sang Jaro Archdiocesan Social Action Center, iya ginpahayag nga santo sa ginpagwa nga Omnibus Decision ni Judge Rommel Leonor, nga napetsahan sang Hunyo 15, 2021 sa Regional Trial Court Branch 21 sa banwa sang Mambusao, Capiz, nasaad nga wala wala nakapasar sa ‘constitutional requirement’ ang search warrants nga gin-isyu sang mga otoridad.
Santo sa resolusyon, ginpaburan sini ang gin-file nga motion to quash sa search warrants nga gin isyu sang RTC Branch 4 sa Manila batuk kanday Marilou Catamin, Rollen Catamin, Eleuteria Caro, Jucie Caro, Ferdinand Capillo kag Marivic Aguirre.
Ang mga ini ang miyembro sang tumandok nga gin-aresto sang mga otoridad sa ginpatigayon nga raid sa nasambit nga banwa.
Suno kay Oso, tuman ang iya kalipay matapos ginpaboran sang hukom ang motion to quash sa search warrants batok sa mga tumandok nga gin-aresto sa natabo nga raid.
Nagapasalamat si Oso sa mga abogado kag hukom nga padayon nga nagatindog sa kamatuoran kag tawhanon nga kinamatarong.
Pahayag niya, kadalag-an ini nga makabig para sa mga human rights advocate kaangay niya nga nagakapigbato para sa tawhanon nga kinamatarong kag hustisya.
