Indi pa mapat-od sang Barangay officials sang Buyu-an, Tigbauan, Iloilo kag sang mga kapulisan kun bala myembro sang New People’s Army ang rason sang pag pull-out sang Galeno Construction company sang ila mga heavy equipment.
Ini matapos nga may yara sang ginapahayag duha ka mga lalaki nga nagpadulong sa bunkhouse sang construction company sa diin may sulat sila nga ginhatag nga para sa “boss” sang mga trabahador.
Sa interview sang Bombo Radyo kay Punong Barangay Warren Briones, iya ginpahayag nga nagpadulong ang isa ka staff sang kompaniya sa barangay agud nga ireport ang pagpadulong sang duha ka mga lalaki nga ginabanta naga edad 18 anyos tubtob 24 anyos.
Wala man ang staff nakahibalo suno kay Briones kun ano ang unod sang sulat nga ginhatag sang duha ka mga lalaki bangud ginhatag na ini nila sa ila nga “boss”.
Madugay na nga gina-construct sang nasambit nga kompaniya ang farm to market road sa Barangay Buyu-an apang tubtob subong wala ini sa gihapon matapos.
Ginkakibot na lang pahayag sang punong barangay sang iya nahibaluan nga nag pull out sang heavy equipment ang construction company sa diin mismo siya ang wala man nakahibalo sang rason.
Samtang suno naman kay Police Chief Master Sergeant Sandy Tiwana, deputy chief of police sang Tigbauan Municipal Police Station, ang duha ka mga lalaki nga naghatag sang sulat sa kompaniya ang masami nga makit-an sa barangay Buyu-an base sa ila nga imbestigasyon.
Antes pa man nagpadulong ang mga lalaki sa bunkhouse, nagpamahaw pa ang mga ini sa isa ka tyangge.
Sa subong, wala pa man nakig-angot ang kompaniya sa ila may kaangtanan sa unod sang sulat nga ginhatag sang duha ka mga lalaki.
