Sa pihak sang pagpangduha-duha sa China-made Sinovac, madamo sang mga tawo ang nagpabutyag sang intensyon nga mabakunahan matapos makit-an ang mga doktor nga nagpabakuna.
Ini ang ginpahayag ni vaccine czar Sec. Carlito Galvez Jr. sa Cabinet briefing kaupod si Presidente Rodrigo Duterte.
Suno kay Galvez, nakit-an niya sa social media nga interesado ang mga Filipino nga magpabakuna kag may mga nabaton man siya nga text messages nga luyag man makabaton sang doses sang bakuna.
Pahayag niya, sang ginbakunahan ang mga doctor, mas nagtaas ang lebel sang uptake kag demand.
Nangin first official recipient si University of the Philippines-Philippine General Hospital (UP-PGH) director Dr. Gerardo Legaspi sang bakuna batuk COVID-19.
Subong nga adlaw, magapadayon ang “mini rollout” sang vaccination program sa mga ospital sang Pasig, Pasay, Taguig, Quezon City kag Manila.
Dugang pa ni Galvez, kabug-usan nga 161 million COVID-19 vaccine doses ang ginalauman nga maabot sa pungsod subong nga tuig.
Ang 20 million doses ang lauman sa second quarter maabot, 68 million doses sa third quarter kag 69 millio doses sa fourth quarter.
Ginpahayag man sang vaccine czar nga sa Marso 3 maabot ang Sinovac vaccines sa Cebu samtang sa Marso 4 naman ang abot sang nasambit nga bakuna sa Davao.
Sa una nga adlaw sang COVID-19 vaccinations, masobra 700 health workers kag government officials na ang nakabaton sang first dose sang Coronavac — ang bakuna nga gin-develop sang Sinovac Biotech.
