MACAU – Tuman ka daku ang nangin epekto sang Coronavirus Disease 2019 (COVID-19) sa ekonomiya sang Macau nga ginbansagan nga Las Vegas of the East.
Suno kay Bombo International Correspondent Ma. Josephine Sapalo, madamu nga empleyado ang nadulaan sang trabaho ilabi na ang mga Filipino nga yara sa Casino.
Magluwas diri, madamo man ang mga dumuluong nga wala nakapauli matapos naabutan sang lockdown apang indi na mandatory ang pagbayad sang overstay bangud nga wala man sila sang may mahimo kundi magpabilin sa Macau.
Ginpahayag ni Sapalo nga ang tagsa ka pamilya ang nakabaton sang 3,000 Patacas ukon kapin sa P20,000 samtang may yara man sang ginhatag nga food packs sa mga apektado nga Overseas Filipino Workers.
Ang domestic helper naman ang may option nga stay-in ukon stay-out apang bangud sa COVID-19, mandatory na ang stay-in sa Macau kag ang mga magpabalibad ang ginapahalin na lang sang ila employer.
Sang Pebrero suno kay Sapalo, yara lamang sa 10 ang kumpirmado nga COVID-19 case rason nga ginbuksan ang taytay kag ginpahanugutan ang bayhe sang ferry nga may ruta nga Macau-Hong Kong vice versa.
Bangud sini, nagtimbuok pa gid ang numero sang COVID-19 rason nga liwat naman nga ginsirado ang taytay kag ginpauntat ang byahe sang ferry samtang ginlimitahan naman ang byahe sang bus kag iban pa nga depampasahero nga salakyan.
Indi kasubong sa Pilipinas, wala sang may ginahatag nga quarantine pass sa Macau kag indi mandatory ang pagsunod sa physical distancing apang mandatory naman ang pagsuksok sang facemask.
Ang madakpan nga wala nagasuksok sang facemask sa mga pampubliko nga lugar ang ginapabayad sang 600 Patacas ukon kapin sa P4,000.
