Garin, gintawag nga “FAKE NEWS” ang balita sang Bombo bisan sa DPWH halin ang data

Gintawag ni Iloilo 1st District Representative Janette Garin nga “Fake News” ang Flood Control Project update sang Bombo Radyo bisan pa nga sa website sang DPWH naghalin ang data.

Santo sa data sang DPWH website, nakabutang ang contract cost, contract effectivity date, status, kag accomplishment.

Si Garin ang nagaisahanon nga kongresista nga may kaangay nga reaksyon matapos ginbalita sang Bombo Radyo ang mga delayed flood control project updates sa mga engineering districts sa probinsya kag sa syudad sang Iloilo.

Base sa data gikan sa website sang DPWH, naglab-ot sa kapin Php 1.1 bilyon ang kabug-usan nga balor sang mga proyekto sang DPWH sa Iloilo 1st District Engineering Office para sa 2025.

Tubtob subong nga tuig, ang iban nga proyekto ang wala pa matapos, base sa data tubtob Marso 31, 2026.

Kalabanan sini ang nagapabilin nga ongoing ukon wala pa makompleto.

Suno sa data, kadam-an sang ginpatuman nga proyekto sang DPWH amo ang may kaangtanan sa flood control, river structures, kag revetment projects.

Nagapakita man ang rekord nga ang top 3 contractors ang nakakuha sang dako nga bahin sang pondo— kapin 40 tubtob 50 porsyento sang kabug-usan nga proyekto sa distrito.

Sa Iloilo 2nd District Engineering Office, naglab-ot sa kapin Php 800 Milyon ang kabug-usan nga balor sang mga proyekto para sa 2025.

Apang, kalabanan sini ang nagapabilin nga ongoing ukon wala pa makompleto.

Santu sa data nga ang top 3 contractors ang nakakuha sang kapin 395 million.

Sa Iloilo 3rd District Engineering Office, naglab-ot sa kapin Php 2 billion ang kabug-usan nga balor sang mga proyekto para sa 2025.

Apang, kalabanan sini ang nagapabilin nga ongoing ukon wala pa mahuman.

Kalabanan sang mga proyekto ang natuon sa flood control, bridge rehabilitation, road maintenance kag multi-purpose buildings.

Sa Iloilo 4th District Engineering Office, naglab-ot sa kapin Php 360 milyon ang kabug-usan nga balor sang mga proyekto para sa 2025.

Apang, kalabanan sini ang nagapabilin nga ongoing ukon wala pa matapos.

Sa Iloilo 6th District Engineering Office, naglab-ot sa kapin Php 1.9 billion ang kabug-usan nga balor sang mga proyekto para sa 2025.

Apang, kalabanan sini ang nagapabilin nga ongoing ukon wala pa malab-ot ang 100%.

Sa Iloilo City District Engineering Office, naglab-ot sa kapin Php 1.8 billion ang kabug-usan nga balor sang mga proyekto para sa 2025.

Apang, kalabanan sini ang nagapabilin nga ongoing ukon wala pa makompleto.

Sa liwat, bukas ang Bombo Radyo Philippines sa anuman nga pahayag ukon pagtadlong sang DPWH kag sang mga contractors agud mahatagan sang patas nga pagwaragwag kag bilang kabahin sang transparency sang pondo sang publiko.