Gintawag ni House Prosecution Panel Spokesperson nga si Iloilo First District Representative Janette Garin nga legasiya sang nakaligad nga administrasyon ang nagalala nga kultura sang character assassination kag name-calling sa tunga sang impeachment trial ni Vice President Sara Duterte.
Sa interview sang Bombo Radyo kay Garin, iya ginpahayag nga maathag nga halimbawa sini ang mga pagpanghikay batok kanday lead prosecutor Atty. Gerville Luistro bangud sa isyu sang laway, amo man nga kay Atty. Amando Virgil Ligutan kaangot sa isyu sang iya sip- on samtang nagapadayon ang trial.
Ginsiling sang kongresista nga sa baylo nga talakayin ang importante nga isyu kag mga ebidensiya nga ipresentar sa impeachment court, mas nahatagan atensyon sang iban ang personal nga pag-atake sa mga personalidad nga may importante nga papel sa trial.
Suno kay Garin, indi makabulig ang ini nga sahi sang diskurso sa pagpangita sang kamatuoran kag sa maayos nga pagtalakay sa mga isyu nga ginaatubang sang pungsod.
Nagpanawagan man siya sa publiko nga ituon ang atensyon sa mga importante nga isyu nga ginatalakay sa impeachment trial sa baylo nga manghikay sa social media.
