Wala sang dapat nga basulon ang Defense team kun indi ang ila kaugalingon kun ngaa ginwithdraw sang prosekusyon ang tatlo ka article sang articles of impeachment batok kay Vice President Sara Duterte.
Ini ang nangin panindugan ni House Deputy Speaker Rep. Janette Garin kasunod sang nangin reaksyon sang depensa sa pag-drop nila sang articles may kaangtanan sa confidential fund misuse, grave threats, kag bribery.
Sa interview sang Bombo Radyo kay Garin, iya ginpahayag nga makapila ka beses nga ginpangigbato sang prosekusyon nga magpresentar ang depensa sa tion nga matapos sila sa kada article.
Apang ginpanginwala lang sang kampo sang bise presidente ang ila suhestyon kag ginpangigbato sang mga ini nga tapuson anay ang tanan nga articles of impeachment.
Pahayag pa niya, mismo man nga depensa ang nagapadugay sang proceedings agud madulaan sang gana ang publiko sa trial batok sa bise presidente kag ma-divert ang atensyon sang mga ini sa iban nga bagay.
Gin-athag man ni Garin nga ang withdrawal sang tatlo ka article ang wala man nagabuot silingon nga pigado ang reklamo sa bise presidente, apang nagapati lamang sila nga bastante na ang unexplained wealth ukon Article II agud maconvict si VP Sara.
Suno sa iya, nakit-an man mismo sang publiko ang mga ginbuyagyag nga mga ebidensya kag indi na man dapat pagpadugayon ang trial.
Pahayag man ni Garin, mas maayo gid sa gihapon nga magpakita ang Bise Presidente sa iya impeachment trial agud direkta sini nga madepensahan ang iya kaugalingon.
Suno sa Kongresista, si Duterte lang man ang makapanginwala sang mga akusasyon nga ginahaboy sa iya kun sa diin mahimo gid sini pinaagi sa pagtambong sa impeachment proceedings.
Apang madumduman nga base sa ruling sang senate impeachment court sa pagpanguna ni Presiding officer Chiz Escudero, indi kinahanglan nga personal nga magpadulong si VP Sara sa iya trial ilabi na nga yara man ang defense team nga nagatambong para sa iya.
