Gindayon sang OPM icon nga si Gary Valenciano ang “Pure Energy: One More Time” concert kagab-i, Disyembre 22, sa Smart Araneta Coliseum matapos nga naglain ang iya pamatyag kag napaslawan nga mapatapos ang nauna nga konsyerto sang Biyernes sang gab-i.
Lakip sa nangin kaupod sang Filipino singer sa iya pagbalik sa entablado amo ang SB19, si Darren Espanto, si AC Bonifacio, kag si Gloc-9 nga nag-perform sang award-winning song nga ‘Walang Pumapalakpak’. Yara man mismo ang anak ni Gary nga si Kiana Valenciano-Tolentino.
Todo-bawi ang 60-anyos nga performer sa iya audience paagi sa pagkanta sa iya greatest hits kaangay sang “Di Bale Na Lang,” “Shout For Joy,” “Eto Na Naman,” kag “Sa Yahweh.” Napuno naman sang emosyo ang Big Dome sa iya renditions sang ballads kaangay sang “Sana Maulit Muli,” “Lead Me Lord,” kag “Warrior Is a Child.”
Una na nga nagpasalamat ang Team Gary V sa mga nagpangamuyo para sa iya ikaayong lawas kag nagpangayo man sang pasaylo sa natabo sang Biyernes.
Gin-utod ang amo nga event bangud sa pagpalanakit sang tiyan sang singer, pila ka beses nga nagsuka, tubtub nga gindala ini sa ospital.
Antes sini, pila man ka health challenges ang naagyan ni Gary kaangay sang type-1 diabetes, pagpaidalom sa bypass surgery, kag paglampuwas sa kidney cancer.
Sa pihak sini tanan, padayon siya nga ginakilala bilang si “Mr. Pure Energy.”
Sang Oktubre, ginpatigayon ang iya 100th concert sa Music Museum. Ini naman nga “Pure Energy: One More Time” concerts sa bilog nga tuig ang kabahin sang iya selebrasyon sang 40th year sa entertainment industry.
