ILOILO CITY – Kun kapoy na sa trabaho kag nagadali nga magpa-uli, ano ang inyo nga excuse?
Sa Tulsa sa Oklahoma, USA, isa ka gas station clerk ang akusado sa pag-stage sang robbery bangud nga nakapoy na ini kag nagakinahanglan sang rason agud nga makapauli sang temprano.
Sang Hunyo 5, nagtawag si Isaisa Jones sa Tulsa Police Department kag nag-report nga isa ka lalaki nga nakasuksok sang mask ang nagtaya sa iya sang armas kag nagpahog nga tiruhon ini kung indi pag-ihatag ang tanan nga kwarta.
Nagpati si Isaias kag gilayon nga naglakat ang kawatan.
Base sa surveillance cameras, nakilala sang kapulisan ang kawatan kag sang natigayon na nga madakpan, ginkakibot sang otoridad ang ila natukiban.
Ang suspek nga nadakpan amo si Steven Jones, apang wala siya sang relasyon sa clerk nga si Isaias Jones.
Suno kay Steven, indi siya ang nagplano sa pagpang hold-up.
May isa ka babayi nga ginkilala kay Alyia Locke nga mutual friend sang duha nga amo ang nagpangabay kay Steven nga mang-hold up sa gas station.
Si Alyia ang gin-aresto kag gin-confirm sini ang pahayag ni Steven.
Gin-aresto man ang clerk kag gin-ako nga nag-contact ini kay Alyia nga pangitaan siya sang tawo nga mag-hold up sa gas station bangud nga kinahanglan niya sang rason agud nga makapa-uli sang temprano.
Ikaw, ano ang alibi mo agud nga makapauli sang temprano?
Mga ka-Bombo, kun ano man ang yara sa pinsar mo, indi na paghimu-a kay basi bwas, wala ka na sang ubra.
