ILOILO CITY – Naghatag sang inspirasyon ang gasoline boy nga nagatrabaho sa sulod sang 13 ka tuig agud makatapos sa kolehiyo kag mapaeskwela man ang iya mga utod.
Sa interview sang Bombo Radyo kay Jay Ivan Figueroa, 31, isa ka self-support kag working student nga tumandok sang Barangay Tigbauan Road, Cabatuan, Iloilo, iya ginpahayag nga nagpaiway anay ini sa pag-eskwela agud suportahan ang iya manghod nga babayi.
Suno kay Figueroa, ginpili niya anay nga magtrabaho sa isa ka gasoline station agud makabulig sa pinansyal nga kinahanglanon sang iya pamilya.
Ginpahayag dugang sang natungdan nga gamay pa lamang ini sang nagahandom nga mag-eskwela kag magkuha sang kurso nga Bachelor of Science in Civil Engineering.
Nahibaluan nga sang nakagradwar na ang iya manghod, nagbalik na ini sa pag-eskwela kag ginpadayon ang pagtuman sa handom nga mangin civil engineer sa palaabuton.
Matapos ang walo ka tuig sa kolehiyo, tuman ka malipayon si Figueroa bangud sa pihak sang kapigaduhon, naggradwar ini sa nasambit nga kurso kun sa diin kadungan man niya nga naggradwar ang iya utod sa amo man nga degree.
Sa subong, plano ni Figueroa nga magpaiway anay sa pagkuha sang board exam bangud unahon anay niya nga ipa-enroll ang iya manghud sa review center bilang preparasyon sa pagkuha sang licensure exam for civil engineers.
