ILOILO CITY – Nagdangat sa P272 million ang nagasto sang political party ni President-elect Ferdinand “Bongbong” Marcos Jr. nga Partido Federal ng Pilipinas sang May 2022 national and local elections base sa Statement of Contributions and Expenditures (SOCE).
Suno kay Atty. George Briones, general counsel sang PFP, ang P272 million nga gasto sang partido ang manubo kun ikumpara sa maximum expenditure nga P337 million nga ginapahanugutan sang layi sa mga national political party.
Ang 400 ka pahina nga SOCE nga gin-file sa Commission on Elections (COMELEC) ang ginpirmahan ni PFP national treasurer Anton Lagdameo nga amo ang gin-designate nga Special Assistant to the President (SAP) sa iya administrasyon.
Sa Section 14 sang Republic Act 7166, ang tagsa ka mga kandidato kag treasurer sang political party ang dapat nga magpasa sang report sang gasto, 30 ka adlaw pagkatapos sang eleksyon.
Dugang pa sa layi, ang mga nagdaog nga mga personalidad ang indi makapungko sa tion nga indi makapasa sang SOCE.
