MANILA – Ginabanta nga magalab-ot sa P65 million ang gastuhon sang Philippine Basketball Association para sa pagpadayon sang liga sa Clark, Pampanga sa Oktubre.
Suno kay PBA Board chairman Ricky Vargas, ang nasambit nga kantidad ang gamiton para sa akomodasyon kag pagkaon sang tagsa ka team.
Ginpahayag ni Vargas nga ang P65 million ang mas manubo na sa una nga pondo bangud sa discounts.
Nalakip man sa P65 million ang free testing kits nga gina-require sa tagsa ka player.
Gindesisyunan sang PBA Board nga magpatigayon sang bubble sa Clark kun sa diin maga-umpisa ang All-Filipino Cup sa Oktubre 9.
Sa pagkamatuod suno kay Vargas, isa lamang ang Clark sa 20 ka mga venue nga ginpili-an kun sa diin isa sa mga ginkonsiderar ang maayo nga connectivity para sa game broadcast.
Ang pagpatigayon sang liga ang nagadepende sa approval sang Inter-Agency Task Force.
Ang mga team nga magapakigbahin ang magatinir sa isa ka hotel samtang ang game naman ang patigayunon sa Angeles University Foundation.
Ang tagsa ka team ang may dedicated bus kag ginaduso ang pag-angkon sang tatlo ka practice venues.
Nauna na nga ginpahayag ni PBA commissioner Willie Marcial nga 2 ka game ang patigayunon sa tagsa ka adlaw kun sa diin ang top 4 teams ang magapaidalom sa elimination round paagi sa twice-to-beat advantage.
Ang semifinals ang mangin best-of-5 affair samtang ang finals ang mangin best-of-7.
