Ginapanawagan sa Department of Energy (DOE) kag sa Department of Trade and Industry (DTI) nga magpatuman sang price cap sa liquified petroleum gas (LPG).
Suno kay Sen. Sherwin Gatchalian, ang nagahinampot nga pagsaka sa presyo sa LPG ang mahimo makaapekto gid sang daku sa mga balay kag sa magagmay nga mga negosyo.
Ginhingyo man sang senador sa duha ka ahensya nga siguruhon ang suplay kag mag-monitor sang istrikto sa market pricing agud nga mapatuman dayon ang price ceiling kun indi pa man kinahanglanon ang saka sa presyo.
Una na nga ginklaro sang LPG Marketers Association sa publiko nga wala nila ginalantaw nga kulangon ang suplay sang LPG sa pungsod sa masunod nga mga binulan, apang may ginaantisipar lang nga pagpanglakaak sa presyo.
Sa ila updated data, gina-project nga makalawig pa sang 35 tubtub 45 ka adlaw ang suplay nga may improvement ipaanggid sa data nga ginpresentar sang ahensya.
Ginalantaw sang grupo nga magalab-ot sa P1,400 tubtub P1,500 ang presyo sang kada tangke sa Abril.
Ginbasehan sang grupo ang nagsaka man nga balayran sa barko bangud sa paglain sang mga ruta sa Middle East bangud sang gyera, rason nga nagalayo ang alagyan via United States, Africa, Canada, kag Australia.#
