Nakabalik na sa Israel ang tatlo ka mga babaye nga ginbihag sang Hamas militants sa Gaza sa sulod sang 15 ka bulan.
Sanday Doron Steinbrecher, 31, British-Israeli nga si Emily Damari, 28, kag Romi Gonen, 24, amo ang una nga ginbuy-an sang militante nga grupo kadungan sang ceasefire nga ginkasugtan sang nagligad nga semana kag nangin epektibo kahapon.
Suno sa Israel Defense Forces, gin-release ang hostages sa Red Cross sa Gaza City inoras matapos nag-umpisa ang ceasefire, kag ang Red Cross workers na ang nagtugyan sa ila sa militar sang Israel.
Pahayag sang Hamas, sa kada hostage nga ila iga-release, katumbas ini sang 30 ka mga Palestinians nga dapat man pagguwaon halin sa mga presuhan sa Israel.
Sa Gaza naman, daw kaangay nga nakaangkon liwat sang kabuhi ang amo nga teritoryo sa Palestine matapos nagbalik ang linibo ka mga tawo sa dalanon.
Ang iban sa ila ang nagaselebrar bangud sa pag-untat sang giyera nga nag-umpisa sadtong Oktubre 2023, ang iban ang nagbisita sa mga lugar kun sa diin ginlubong ang ila nga mga himata, samtang ang iban naman ang nagbalik agud lantawon ang nabilin pa sa ila mga puluy-an nga halos napulbos sang giyera.
Una na nga ginpahayag ni Israeli Prime Minister Benjamin Netanyahu nga handa ang iya pungsod nga mag-atake liwat batok sa Hamas kun mapalpak ang istoryanay sa ikaduha nga phase sang ceasefire.
Pahayag ni Netanyahu, temporaryo lamang ini nga ceasefire kag may kinamatarong sila nga magbalik sa giyera sa Gaza kag ginaalegar nga may pahanugot ini halin sa ila kaalyado nga Estados Unidos nga halin mismo kay US President-elect Donald Trump.
Sa bahin sang Hamas, nagsabat ang armed wing sini nga magasunod sila sa nakasugtan nga ceasefire kag sa timeline sa pagpaguwa sang mga bihag sa kondisyon nga sundon man ini sang Israel.
Oktubre 7, 2023 sang nag-atake ang Hamas militants sa southern Israel. Masobra 1,100 ang napatay sa amo nga pagpang-atake lakip ang apat ka mga Pinoy, kag 240 ang gindala nga bihag sa Gaza.
Sa kaakig sang Israel, naglunsar ini sang gyera batok sa Hamas militants nga rason sang pagtal-as sang Palestinians sa Gaza, halos napudpod ang teritoryo, kag ginkamatay sang masobra 46,000 ka mga tawo.
