Gintulod liwat ni United States President Joe Biden nga magpatigayon na sang gilayon nga ceasefire sa gyera sang Israel kag Hamas sa Gaza.
Suno sa White House, ginmuno ini ni Biden kadungan sang ila pag-istoryahanay ni Israeli Prime Minister Benjamin Netanyahu paagi sa telepono.
Lakip man sa gindiskusyunan amo ang mga tikang nga ginahimo subong para malab-ot ang kasugtanan nga mauntat anay ang away sa Palestine kag mahilway na ang nabilin pa nga mga bihag.
Naghatag man sang update si Netanyahu kaangot sa iya sugo sa iya top-level security delegation sa Doha, Qatar nga amo ang nagatutok sa hostage deal.
Una na nga ginpahayag sang American national security adviser nga si Jake Sullivan nga tuman na gid kalapit ang duha ka mga partido nga makalab-ot sa kasugtanan apang may mga dapat pa nga hitsuhon. May tyansa pa suno sa iya nga may agreement nga malab-ot antes ang pagbiya ni President Biden sa pwesto sa Enero 20, apang sa subong may mga balibad pa nga ginahimo ang Hamas.
Oktubre 2023 pa sang nag-umpisa ini nga giyera.
Bangud sa pagtimalos sang Israel sa Hamas militants, masobra na sa 46,000 ka mga tawo ang napatay sa Gaza suno sa Palestinian health officials, nagtal-as na ang kadam-an sa mga residente, kag nalikop sang humanitarian crisis ang bilog nga teritoryo.
