Ginbaton sang Hamas militants ang ceasefire proposal sang US envoy nga si Steve Witkoff.
Ini nga anunsyo ang nagadala sang panibag-o nga paglaum sang pagtapos sang gyera sa tunga sang Israel kag Hamas sa Gaza nga nag-umpisa sang Oktubre 2023.
Sa bag-o nga proposal, nakasaad ang paghilway sang 10 ka mga bihag kag 70 ka adlaw nga pag-untat sang away.
Ginpahayag nga ang mga bihag amo ang mga Israeli nga ginahuptan sang Hamas kag ginseparar sa duha ka grupo.
Nakabutang man sa proposal ang pagpaguwa sang Israel sang mga ginpang-preso sini nga mga Palestino.
As of press time, wala pa sang kumpirmasyon nga ginpaguwa ang gobyerno sang Israel kaangot diri.
Matandaan nga sang Enero, may ceasefire agreement man sa tunga sang Hamas kag Israel, apang natapos na sang Marso kag nagbalik ang Israel sa ila military campaign nga rason sang pagbayluhanay sang duha ka kampo sang rockets kag mga atake.
Nauna na nga ginpahayag ni Israeli Prime Minister Benjamin Netanyahu nga magasugot lamang sila sa temporary ceasefire kun buy-an sang militante ang tanan nga hostages kag tapuson lamang nila ang gyera kun mapanas na nila ang Hamas.
