Ginhilway sang Hamas ang tatlo ka iban pa nga Israelis nga ila ginbihag halin sang Oktubre 2023.
Ini amo ang Israeli-American nga si Sagui Dekel-Chen, Israeli-Russian nga si Sasha Trupanov kag Israeli-Argentinian nga si Yair Horn nga ginparada anay sa entablado, ginpahambal sa atubang sang mga tawo, antes gintugyan sa Red Cross.
Ginhatagan man sila sang militante nga grupo sang gift bags kag certificate nga amo ang nagamarka nga hilway na sila.
Bilang kabaylo, nagpaguwa man ang Israel sang 369 ka mga preso nga Palestinians kag detainees.
Ini na ang pang-anum nga hostage-prisoner swap sang Hamas kag Israel sa idalom sang una nga hugnat sang ceasefire agreement.
Sa subong, 19 na ka mga Israelis kag lima ka Thai hostages ang nabuy-an sang Hamas kag 73 pa ang nabilin sa Gaza, apang sa sini nga numero, ginapatihan sang Israeli military nga patay na ang katunga.
Nag-isyu man sang statement si US President Donald Trump nga dapat Sabado sang udto, na-release na sang Hamas ang tanan nga hostages sa Gaza. Pananglitan wala pa suno sa iya, ang Israel na ang maga-desisyon kun maga-violate sila sa ceasefire kag magbalik sa giyera kag suportahan ini sang Estados Unidos.
“Israel will now have to decide what they will do about the 12:00 O’CLOCK, TODAY, DEADLINE imposed on the release of ALL HOSTAGES. The United States will back the decision they make!” kabahin sang statement ni Trump sa iya nga social media platform.
