ILOILO CITY – Irrevocable ukon indi na mabawi ang Good Conduct Time Allowance nga ginhatag sa isa ka preso magluwas lang kun may yara sang restraint.
Ini ang pahayag sang Law expert nga si Atty. Joenar Pueblo may kaangtanan sa ginhatag nga Good Conduct Time Allowance kay US Marine Lance Cpl. Joseph Scott Pemberton nga amo ang nagpatay sa Filipina transwoman nga si Jennifer Laude sang 2014.
Sa pagpaathag ni Atty. Pueblo, ang Good Conduct Time Allowance ang ginahatag sa mga preso nga nangin maayo sa sulod sang presuhan agud nga mabuhinan ang ila silot magluwas lamang sa mga nakahimo sang heinous crime.
Suno kay Atty. Pueblo, ang paghatag sang Good Conduct Time Allowance ang nasanto sa Republic Act 10592 nga naga-amyendar sa Revised Penal Code kun sa diin ang Bureau of Corrections amo ang nagahatag sang clearance.
Tuhoy naman sa nationality ni Pemberton kun sa diin madamo ang nagakwestyon kun ngaa ginhatagan siya sang Good Conduct Time Allowance kag kun ngaa sa Camp Aguinaldo siya ginpreso sa baylo nga sa New Bilibid Prison, ginpahayag ni Atty. Pueblo nga ang ginbasehan amo ang Visiting Forces Agreement sa tunga sang Pilipinas kag Estados Unidos.
Kun sundon ang GCTA computation ni Pemberton, naglab-ot na sa 10 ka tuig, isa ka bulan kag 10 ka adlaw ang pagserbisyo sang US Marine nga ginpamatbatan sang 2015 sang 6 tubtub 10 ka tuig nga pagkapreso bangud sa kaso nga homicide.
Immediately executory ang mandu sang Olongapo City Regional Trial Court nga paguwaon na sa presuhan si Pemberton magluwas lang kun mapapati sang pamilya sang biktima ang Korte Suprema nga indi applicable ang Good Time Allowance para sa US Marine.
