Dapat nga tayuyon ang serbisyo sa mga pumuluyo — madayon man ukon indi ang Barangay and Sangguniang Kabataan Elections (BSKE) sa Nobyembre 2026.
Ini ang pahayag ni Punong Barangay Ruby Ann Geanga, presidente sang Association of Barangay Captains (ABC) La Paz, kasunod sang mga ginaduso nga hagna nga i-postpone sa 2028 ang eleksyon.
Suno kay Geanga nga amo ang punong barangay sang Banuyao, La Paz, pabor ini sa ila ilabi na bangud sa iya bahin, katapusan na sini nga termino bilang kapitan sa ila lugar.
Apang ginakilala man sini ang opinyon sang iban nga gusto na gid ma-islan ang ila nga mga lider bangud diskumpyado sila sa ila nga mga hinimuan ukon wala gid sang inubrahan.
Sa ila barangay suno kay Geanga, wala sang problema sa mga proyekto bangud gina-deliver nila ini kag wala sang delay sa mga development plan.
“Kun gaserbisyo ta sa barangay ta, indi ta pagpanumdumon ang eleksyon. We have to serve our barangay because ara kita da nagapungko. May eleksyon kag wala, dapat ang aton nga obligasyon, tayuyon gid na dapat. It does not matter kun ma-eleksyon bwas or ma-eleksyon after ten years. You have to do your responsibility sa imo barangay kay nagpadalagan ka,” suno kay Geanga.
Nahibaluan nga padayon subong ang preparasyon sang Commission on Elections (COMELEC) sa BSKE sa Nobyembre.
May pending nga mga hagna sa Senado kag Kamara nga sayluhon ini sa Nobyembre 2028 kag ginaduso man nga palawigon ang termino sang amo nga mga opisyal sa barangay.
Ginpahanumdom naman ni Geanga sa mga pumuluyo nga yara sa ila ang gahum sa pagpili sang ila tagsa ka mga lider.
“Kada eleksyon ginahatagan kita sang tyansa nga makapili sang tsakto nga leader sa aton nga barangay. Para sa kaayuhan man sang barangay, kamo na mismo ang nakabalo kun sin-o ang lider nga ibutang niyo, kay kamo ang nagaboto, sila nagapadalagan lang na,” suno pa sa barangay official.#
