ILOILO CITY – Ginpaagi ni Police Regional Office (PRO) 6 Director Police Brigadier General John Bulalacao sa ambahanon ang iya paghatag sang mensahe, pila ka adlaw bag-o ang pagretiro sa serbisyo.
Sa farewell speech ni Bulalacao kadungan sang flag raising ceremony sa PRO-6, gin-umpisahan sang PRO-6 Director sa pagkanta sang ambahanon nga ‘My Way’ ang iya mensahe.
Nangin emosyonal si Bulalacao samtang nagahatag sang mensahe sa mga pulis sa Western Visayas.
Sa iya nga pagretiro sa pwesto, ginpahayag ni Bulalacao nga kuntento siya sa iya nga nangin performance bangud sa positibo nga feedback sang pumuluyo.
Nagpasalamat man ang PRO-6 Director sa Ginuo bangud nga iya nalampuwasan ang tanan nga pagpanghangkat bilang isa ka police official.
Kadungan sini, ginpahanumdom man sang natungdan sa tanan nga pulis nga magtrabaho sang maayo kag magserbe bilang maayo nga ehemplo sa publiko.
Kadungan sini, ginpasalamatan man ni Bulalacao ang media sa pagpalapnag sang maayo nga balita.
Ginpahayag ni Bulalacao nga sa bulig sang media, napahibalo ang publiko sa mga aktibidad, lihok kag programa sang Philippine National Police (PNP).
Kun magbiya na siya sa serbisyo, ginpahayag ni Bulalacao nga hidlawon siya sa iya trabaho nga nagahatag sang pahayag sa mga katapo sang media.
Kun may yara man sang malain nga komentaryo, ini ang nahangpan sang PRO-6 Director bangud nga indi tanan ang nagapabor sa iya.
