ILOILO – Pormal na nga ginmandu ni Iloilo Gov. Arthur Defensor Jr. ang travel restrictions sa probinsya sang Iloilo bangud sa Coronavirus Disease 2019 (COVID-19).
Sa ginpatigayon nga press conference, ginpatpat ni Defensor ang kaundan sang Executive Order No. 028-C series of 2020 tuhoy sa pagpatuman sang mas istrikto nga travel restrictions sa probinsya sang Iloilo.
Suno kay Defensor, katuyu-an sang pagpatuman sang general community quarantine tubtub sa Abril 14, amo nga malimitahan ang mga tawo nga nagalagaw sa probinsya agud nga indi na maglapta ang virus.
Ginpahayag ni Defensor nga may yara sang exemptions kun sa diin indi sakop sang travel restrictions ang mga masunod:
-Government officials kag employees nga may yara sang ginapatigayon nga official functions
-Medical personnel, health workers ukon humanitarian workers
-Residente sang syudad sang Iloilo nga kinahanglan nga magpadulong sa probinsya sang Iloilo (kasubong sa mga nagatrabaho)
-Returning residents sang probinsya kag syudad sang Iloilo apang kutub na lamang sa Marso 17 ang igahatag nga tion
Nakasaad man sa Executive Order nga suspendido ang klase sa tanan nga level (Public kag Private) tubtub sa Abril 14 kag gina-engganyo ang pagpatuman sang flexible working arrangement.
