Nagpahayag sang suporta ang Association of Generals and Flag Officers, Inc., sa panindugan sang gobyerno nga ipakigbato ang sovereign rights sang Pilipinas sa West Philippine Sea.
Nagpanawagan ang nasambit nga grupo sa Armed Forces of the Philippines (AFP) nga protektahan man ang ila soldado nga yara sa frontline.
Sa interview sang Bombo Radyo kay retired Vice Admiral Emilio Marayag Jr., presidente kag board chairman sang Association of Generals and Flag Officers, Inc., iya ginpahayag nga ang ginahimo nga tikang sang China Coast Guard kag China Maritime Militia ang unprofessional kag paglapas sa United Nations protocols.
Gindayaw naman ni Marayag ang mga nag-upod sa rotation and resupply mission sa BRP Sierra Madre sang Hunyo 17 sa Ayungin Shoal bangud sa ginpakita nga pagka-propesyunal sa pihak sang agresibo nga tikang sang China Coast Guard.
