ILOILO CITY- Ginalantaw sang isa ka Political Law Professor nga dako nga disbentaha para sa Pilipinas kun matuod gid man nga may natabo nga gentleman’s agreement sa tunga ni anay Presidente Rodrigo Duterte kag sang China kaangot sa isyu sa West Philippine Sea.
Sa interview sang Bombo Radyo kay Atty. Joenar Pueblo, isa ka International and alternative dispute resolution practitioner, iya ginpahayag nga ang ginapakita nga mga tikang sang China sang damlag lang ang kasubong nga senyales nga ginapakigbato sini kun ano ang nakasugtan nila ni anay Presidente Duterte.
Matandaan nga sa ginbuyagyag ni anay spokesperson Atty. Harry Roque sang administrasyon ni Duterte, may “verbal agreement” ang presidente sa China kun sa diin nakasaad nga tubig kag pagkaon lamang ang mahimo madul- ong sang Pilipinas sa barko nga BRP Sierra Madre nga amo ang nagabantay sa Ayungin Shoal.
Gina-alegar nga nakabutang sa kasugtanan nga indi pwede magdul-ong ang Pilipinas sang materyales para nga kay-uhon ang amo nga barko nga naka-standby na sa Ayungin halin pa sang 1999.
Ini nga pahayag ni Roque ang ginkontra naman ni anay presidential adviser Salvador Panelo nga nagpanindugan nga wala sang deal si Duterte sa China nga naangot sa West Philippine Sea.
Suno kay Atty. Pueblo, kun may kasugtanan gid man, nagakadapat nga indi na ini applicable sa subong nga administrasyon ni Presidente Ferdinand Marcos Jr.
Apang suno sa Bombo Abogado, kun ipakigbato gid sang China ang kasugtanan, pierde gid diri ang Pilipinas ilabi na nga super power ang China kag isa lamang ka third world country ang Pilipinas.
Pahayag pa niya, sa mata sang China, wala nagatuman sang kasugtanan ang Pilipinas kag pat-ud nga maguba ang imahe sang pungsod kag tawgon sang China ang Pilipinas nga butigon kaag maguba man ang imahe sang pungsod sa international community.
