5% na lang kinahanglanon ni incumbent President Donald Trump agud nga makuha sini ang 15 ka mga electoral votes sa estado sang North Carolina.
Suno kay Bombo International Correspondent Rene Tallador direkta sa North Carolina, isa sa mga correspondent sang Bombo Radyo Iloilo sa 50 ka mga estado kag sa distrito sang Columbia sa Estados Unidos, ang mga business establishments sa North Carolina ang pro-Trump apang indi man manigar nga ang pila ka mga pumuluyo ang nagtipyok sa Democrat.
Ini bangud nga dako ang epekto sang COVID-19 response ni Trump sa mga Americans rason nga nagsaylo sila sang suporta kay Democratic candidate Joe Biden.
Pahayag ni Tallador, ang ginakakulbaan subong sang mga Republicans amo ang estado sang Pennsylvania kag Georgia nga may magamay lang nga abanse si Trump kontra kay Biden indi kaangay sang 2016 nga election nga tuman ka dako ang abanse sang Presidente kontra kay Hillary Clinton.
Hatagan man sang tikang ni Trump ang gina-alegar sini nga dinayaay sa bahin sang Wisconsin sa diin mas mataas ang boto kun ipaanggid sa numero sang registered voters may yara ang nasambit nga estado.
Sa subong nagapangita na sang abogado ang Republican party agud nga matutukan ang isyu.
