ILOILO CITY- Amat- amat na nga nagakadulaan sang gana ang mga German companies nga naga-operate sa Pilipinas nga padayunon ang ila operasyon bangud sa masami nga pagbag-o sang mga polisa kag mataas nga presyo sang enerhiya.
Suno sa Spring 2024 AHK World Business Outlook Survey nga ginpatigayon sang German-Philippine Chamber of Commerce and Industry (GPCCI), ang numero sang German companies sa Pilipinas nga positibo sa sitwasyon sang ila negosyo subong ang nagsarurot sa 50 percent sang Mayo 2024 nga survey halin sa 62 percent sang Mayo 2023.
Ang latest spring survey nga namangkot sa 70 ka mga kompaniya ang nagapakita man nga nagnubo sa 61 percent halin sa 74 percent sang 2023 ang mga firms nga may yara sang mas maayo nga expectations sa masunod nga 12 ka bulan.
Ang survey nagtumod sa economic policy bilang nagapanguna nga concern, amo man ang komplikado nga mga regulasyon, kag ang bureaucracy nga nagaresulta sa indi mapaktan nga environment.
Pila man sa mga rason nga ginplastar sang mga German firms amo ang supply chain disruptions kag infrastructure.
Suno kay Marian Norbert Majer, German-Philippine Chamber of Commerce and Industry board director kag policy and advocacy chairperson, kinahanglan sang gobyerno nga pungkuan ini kaupod sa mga negosyante agud maresobra ang nasambit nga mga pagpanghangkat.
Dugang niya, ang pagtalupangod sa sini nga mga isyu ang makabulig agud mas makahimo sang paborable nga business environment agud makabulig man sa paglab-ot sang Pilipinas sa sustained nga pagsanyog sang ekonomiya.
