Magapadala ang Germany sang dugang nga drones sa Philippine Coast Guard (PCG) agud magamit sang Pilipinas sa operasyon sa West Philippine Sea (WPS).
Natabo ini nga development kadungan sang pag-abot ni German Foreign Minister Annalena Baerbock sa Manila kun sa diin nagbisita ini sa Malacañang kag sa PCG Headquarters sa Port Area.
Suno kay PCG spokesperson Rear Admiral Armado Balilo, mahimo man magamit sa iban nga operasyon sang talatapan ang “apat ukon mas madamo pa” nga drones.
Pahayag pa ni Balilo, ini nga drone delivery ang parte sang €129 million (P7.9 billion) nga initial assistance halin sa German government.
Sang 2022, nagpadala man ang amo nga pungsod sang duha ka drones sa PCG nga amo subong ang ginagamit sa training.
Kadungan sang official visit ni Baerbock sa Pilipinas, ginpahayag sini nga ang delikado nga aktwasyon sang China sa mga barko sang Pilipinas sa West Philippine Sea ang nagatuga sang kahangawa mangin sa Europa.
Ini nga mga lihok suno sa iya ang maathag nga nagalapas sa international laws kag nagabalabag man sa freedom of navigation.
“I think we all agree that the world doesn’t need another crisis. There are rough winds blowing across the South China Sea, and this is happening in the middle of one of most dynamic economic regions of the world,” pahayag sang diplomat.
Dugang sini, magapadayon ang Germany — paagi sa European Union — sa pagtrabaho kaupod sa Association of Southeast Asian Nations agud ma-promote ang United Nations Convention on the Law of the Sea. Nakasaad diri nga ang mga estado ang may yara sang kinamatarong sa resources nga yara pa sa sulod sang ila nga 200-nautical-mile exclusive economic zone (EEZ).#
