ILOILO CITY – Naga-uyang sang P7.2 billion nga balor sang bugas ang Pilipinas sa tagsa ka tuig.
Ini ang rason kun ngaa nga gina-enganyo sang Philippine Rice Research Institute ang publiko nga magkuha lamang sa lamesa sang ila masarangan nga kaunon.
Suno kay Dr. Karen Barroga, deputy executive director for rice development sang Philippine Rice Research Institute, iya ginpahayag nga base sa figure, 385,000 metric tons sang bugas sa tagsa ka tuig ang mahimo kuntani nga makapakaon sa 2.5 million Filipinos.
Pahayag niya, madamo sang ginatawag nga “lapad mata”, gani ila nga ginakampanya nga magsukad lamang sang maubos kaon.
Dugang pa niya, may mga kalan-an sa probinsya kag syudad sa pungsod nga naga-partner sa ila agud nga masiguro nga mapatuman ang default serving nga tunga lamang sang isa ka cup sang kan-on agud nga indi mauyang ang pagkaon.
46 naman ka mga major areas sa pungsod, lakip na ang Quezon City, Manila, kag Baguio City, ang may ordinansa nga nagarekomendar sa mga kalan-an nga magserbe sang tunga sang cup nga kan-on.
