Wala napunggan ni Gian Frederick Arellano ang iya kalipay matapos nga nakuha sang ila team nga Western Visayas ang kampyonato sa Sepak Takraw Secondary Boys sa Palarong Pambansa 2025.
Sa interview sang Bombo Radyo kay Arellano, iya ginpahayag nga indi nangin mahapos ang ila naagyan sang iya nga team antes nakuha ang kadalag-an.
Suno sa natungdan, antes pa man pormal nga nagsugod ang Palaro, nag-angkon ini sang duha ka injuries, apang, wala ini nangin upang sa iya agud nga malab-ot ang handom nga gold medal.
Apisar nga ini ang labing-una kag ulihi nga pagpasakop ni Arellano sa amo nga hampang, ginpasigurado sini nga indi siya mag-untat sa paghampang sang Sepak Takraw.
Bangud sa abilidad ni Arellano, napilian ini sang Team sang Sepak Takraw sang Sta. Barbara.
Nahibaluan nga si Arellano ang tumandok sang Brgy. Dalid, Alimodian, Iloilo, kon sa diin, lakip sa iya kaupdanan sa team nga sanday Clark Jerson Rabino, Kent Daryl Valentin, kag Redmark Alido ang lunsay tumandok man sang amo nga banwa.
