Kumbinsido si Department of National Defense (DND) Secretary Gilberto Teodoro Jr. nga may interes gid ang China sa pagpanghilabot sa eleksyon sa Pilipinas.
Suno kay Teodoro, maathag katama nga may tuyo ang China kag sa pagkamatuod suno sa tiglikom, yara na sa ila DNA nga manghilabot sa amo sini nga bagay.
“‘Yang China talagang may interest na pakialaman ang eleksyon dito dahil obvious na obvious ‘yan at nakikialam naman talaga yang mga yan kasi nasa DNA nila yan,” pahayag sang defense official.
Apang gindugang man sini nga indi lang Beijing ang may amo sini nga interes kundi ang “non-state rogue actors.”
“‘Yan ay laging present hindi lamang sa china kung hindi non-state rogue actors,” dugang sini.
Matandaan nga sa Senate hearing sang Abril 24, ginpahayag ni National Security Council spokesperson Assistant Director General Jonathan Malaya nga may mga indikasyon nga nagahilabot ang mga Chinese sa midterm elections sang Pilipinas nga matabo na sa Mayo 12.
Madasig nga ginbali sang China ang akusasyon kun sa diin gin-athag ni Chinese foreign ministry spokesperson Guo Jiakun nga may ginasunod sila nga prinsipyo sang non-interference sa domestic affairs sang iban nga mga nasyon.
Apang suno naman kay Teodoro, nagahimo ang China sang “united front works” kag nagtukod pa gani sang government department para sa sini nga mga operasyon. Gindugang sini nga ginahimo ini sang China paagi sa illegal, coercive, aggressive and deceptive actions.
