Ginlutos sang Turkey ang Gilas Pilipinas sa una nga tune-up game sini sa luwas sang pungsod bilang preparasyon sa FIBA Olympic Qualifying Tournament.
Nagtapos ang hampang 84-73 apisar sang 21 puntos ni Justin Brownlee nga ginbubo para sa nationals.
Isa lamang sa pito ka three-point attempts ang napasulod sang naturalized import kag nakahimo pa sang anum ka turnovers, samtang naka-17 puntos naman kag 11 rebounds si June Mar Fajardo.
Magluwas sa duha, wala na sang player ang Gilas nga naka-double digit. Syete puntos ang na-skor ni Kai Sotto sa 19 minutos sini nga paghampang kag na-foul out pa sang 2:35 na lamang ang nabilin sa game.
Nagpanguna naman sa World No. 24 nga Turkey si Tarik Biberovic nga may game-high 23 points lakip na ang 5-of-9 sa tres.
Balantayan ang masunod nga exhibition match sang Gilas sa Hunyo 30 batok sa Polish National Team sa Sosnowiec, Poland antes ini dalayon magsabak sa Olympic qualifiers kun sa diin maatubang sini ang early-favorite nga Latvia kag ang team sang Georgia.
