Nagpanglakaak sa 30-puntos ang abanse sang Gilas Pilipinas sa Hong Kong sa labing-una sini nga hampang subong nga tuig 2024 nga para na sa 2025 FIBA Asia Cup Qualifiers.
Ang 94-64 nga kadalag-an sang Gilas sa Tsuen Wan Stadium ang ginpangunahan sang naturalized import nga si Justin Brownlee nga may 16-puntos, pito ka rebounds, pito ka assists, kag tatlo ka steals.
Ginbubo sang nationals ang pwersa sini sa ikatatlo nga quarter kun sa diin ginhapo ang kasumpong nga malagas ang 30-9 nga skor kun sa diin nagdangat sa 71-46 ang lead pagkatapos sang amo nga frame.
Talalupangdon man nga sa pagbukas pa lamang sang hampang, nagpakita na sang gilas ang national team sa 9-0 nga skor antes ini nalagas sang Hong Kong sa second period.
Daku man ang nabulig ni Kevin Quiambao nga may 15 points; Kai Sotto nga may 13 points kag 15 rebounds; kag Jamie Malonzo nga may 11 points.
Ini ang labing-una nga hampang sang Pilipinas sa idalom ni Tim Cone bilang permanent head coach.
Ini man ang ginakabig nga pagbalik ni Brownlee sa court matapos ini naglagbong sa doping test kasunod sang Asian Games sang Oktubre 2023, ginpapanaogan sang tatlo ka bulan nga suspensyon, kag wala nakahampang kaupod sa Barangay Ginebra sa Philippine Basketball Association (PBA) Commissioner’s Cup.
Sunod nga magabalik ang Gilas sa Pilipinas kun sa diin masaksihan sang mga Pinoy ang sambuwa sini batok sa Taiwan sa Domingo, Pebrero 25, nga amo man ang pagtakop sang first window sang qualifiers.#
(Photos: FIBA)
