Ginlutos sang Gilas Pilipinas ang Taiwan Mustangs, 74-64, sa isa ka exhibition match sa Philsports Arena sa Pasig City subong nga gabi, Hunyo 24, antes ini magbiya sa pungsod para sa Olympic Qualifying Tournament.
Nagpanguna sa national team si Dwight Ramos nga may 19 puntos, apat ka steals, kag tatlo ka rebounds; ginasundan sang naturalized import nga si Justin Brownlee nga nakapaulan sang 12 puntos; kag Kai Sotto nga may nueve puntos.
Sa bahin sang Taiwan, may 15 puntos si Oscar Lopez; nagdugang sang 13 ang anay PBA champion nga si Alex Cabagnot samtang may 12 si Rashawn McCarthy.
Buwas natalana nga magbyahe ang Gilas para sa Olympic qualifiers apang antes ang pormal nga pagsabak sa Latvia, may friendly matches anay ang nationals batok sa Turkiye kag Poland.
Sa aktwal na nga OQT sa Hulyo 3-4, maatubang sang Pilipinas ang host nation kag ang Georgia.
Magahampang para sa Pilipinas si Brownlee; PBA stalwarts nga sanday June Mar Fajardo, Chris Newsome, CJ Perez, Japeth Aguilar, kag Calvin Oftana; paga-updan man sang international players nga sanday Sotto (Koshigaya), Ramos (Hokkaido), kag Carl Tamayo (Changwon LG); kag ang amateur standouts nga sanday Kevin Quiambao (La Salle) kag Mason Amos (Ateneo).
Indi makahampang sanday Scottie Thompson, Jamie Malonzo kag AJ Edu bangud sa ila injuries.
Photo: David Cubangbang
