Wala sang kaluoy nga gintambakan sang Gilas Pilipinas sang 53 ka puntos nga abanse ang pangayaw nga Chinese Taipei sa ikaduha nga hampang sa first window sang FIBA Asia Cup Qualifiers.
Ginhimo sang Gilas ang 106-53 nga kadalag-an sa atubang sang linibo ka Pinoy basketball fans sa PhilSports Arena kagab-i, Pebrero 25.
Ini ang labing-una nga hampang ni Justin Brownlee sa pungsod sa sulod sang 10 ka bulan rason nga wala gid sini ginpaslaw ang fans paagi sa iya 26 puntos, 13 ka rebounds, lima ka assists, duha ka blocks, kag isa ka steal nga amo ang nagpanguna sa national team nga makuha ang 2-0 record sa Group B.
Ginpakita ni Brownlee ang kahidlaw sini sa hampang paagi sa pagbubo sang 11 puntos sa imbukada nga quarter kun sa diin ginhapo na ang kasumpong nga malagas ang double-digit lead, 26-13, sa pagtapos sang una nga frame. Halin didto, wala sang bulu-balikid ang Gilas tubtub sa fourth quarter.
Kaangay sa hampang batok sa Hong Kong, nagpangaduha si Kai Sotto kay Brownlee sa puntos kun sa diin nakapaulan ini sang 18 puntos, 10 ka rebounds, lima ka assists, kag tatlo ka blocks.
Magluwas sa duha ka players, double-digit man ang na-skor nanday Calvin Oftana, Carl Tamayo, kag Kevin Quiambao.
Pareho sa Gilas, wala man sang kalutusan ang New Zealand sa una nga window sang Group B.
Balantayan ang masunod nga window sang qualifiers sa bulan sang Nobyembre.#
The Scores:
Philippines 106 – Brownlee 26, Sotto 18, Oftana 13, Ramos 12, Tamayo 11, Quiambao 10, Aguilar 8, Perez 4, Newsome 2, Thompson 2.
Chinese Taipei 53 – Liu 13, S. Lin 8, Z. Hsieh 6, Wang 6, Chang 4, B. Lin 3, C.C. Lin 3, Chen 2,C. Lin 2, Gao 2, Yu 2, Y. Hsieh 2.
Quarters: 26-13, 52-27, 82-41, 106-53.
