Napaslawan ang Gilas Pilipinas nga maka-abanse sa final match sang FIBA Olympic Qualifying Tournament matapos nga gintambakan ini sang Brazil sang 24 puntos sa third quarter sang semifinal match subong nga gab-i, Hulyo 6.
Nagtapos ang hampang, 71-60, pabor sa World no. 12 nga amo man ang opisyal nga pagtakop sang kampanya sang Gilas para sa Paris Olympics nga amo kuntani ang labing-una nga tion nga makatapak ang Pilipinas sa Olympiada sa sulod sang masobra lima ka dekada.
Sa una nga quarter, nakuha pa sang nationals ang lead, 22-12, apang na-amat-amat ini lagas sang Brazil paagi sa 15 puntos sini nga nahimo sa second frame nga mas mataas sa 11 puntos sang Pilipinas.
Pagsulod sa third quarter, diri na kag dalayon nga nagbugtaw ang Brazil kag ginbubo ang bug-os nga pwersa paagi sa 24 puntos nga indi hamak nga labaw sa sais puntos gid lamang nga napasulod sang Pilipinas.
Gintinguhaan pa sang national team nga makabangon sa 51-39 nga abanse sang kasumpong sa pagsugod sang katapusan nga quarter kun sa diin nakapaulan pa ini sang 21 puntos nga labaw sang isa sa 20 puntos sang Brazil apang wala na naka-recover pa.
Nanguna si Justin Brownlee sa nationals nga may 15 points kag 8 rebounds, samtang nagdugang naman si Dwight Ramos sang 13 points sa knockout match.
Buhin sa pwersa sang nationals ang 7-foot-3 center nga si Kai Sotto nga nag-upod man sa practice sang nagligad nga gab-i apang wala nakahampang sa aktwal nga sambuwa sa Riga. Ini kaangot sa insidente nga natabo sa second quarter sang hampang sang Pilipinas batok sa Georgia sang Huwebes sang gab-i kun sa diin natumba si Kai kag napintalan sang Georgian kag Orlando Magic star nga si Goga Bitadze.
Apisar sang kalutusan sa sini nga tournament, naangkon sang Gilas ang pagdayaw sang mga Pilipino bangud sa maragtason sini nga performance batok sa duha ka European squads nga nakaatubang sa Group A. Una nga ginlutos sang Pilipinas ang World No. 6 nga Latvia kag sang naatubang naman sini ang World No. 23 nga Georgia, nalutos ang national team sa duha gid lamang ka puntos.
Sa pihak nga bahin, maatubang naman sang Brazil sa finals ang winner sa semifinal match sa tunga sang host nga Latvia kag Cameroon nga una na sini nga nalutos sa pihak nga bracket. #
