Ginlutos sang Gilas Pilipinas ang Qatar, 74-71, sa imbukada nga hampang sa serye sang friendly matches sa Doha International Cup.
Nanguna sanday Dwight Ramos, Justin Brownlee, kag big man nga si AJ Edu agud nga makalagas sa fourth quarter kag mapanas ang 11-point deficit.
Sa ikatatlo nga quarter, 60-51 ang skor pabor sa hosts apang nagbawi ang Philippine national team sa 23-11 nga abanse sa final period agud makuha ang kadalag-an pasado alas tres kaina sang kaagahon oras sa Pilipinas.
Antes sini nga hampang, madamo ang naham-ot sa gin-share ni Calvin Oftana nga video kun sa diin makit-an ang pila sa Gilas players nga na-stuck sa elevator sa Doha apang nabuligan man sang technician.
Lakip sa yara sa video amo sanday Junemar Fajardo, Ramos, Edu, Kevin Quiambao, Oftana, kag iban pa.
Alas 11:00 karon sa gab-i oras sa Pilipinas, magabalik pa ang Gilas sa amo gihapon nga court sa QU Sports & Events Complex sa Doha agud atubangon ang Lebanon.
Ini nga mga hampang ang kabahin sang preparasyon sang Gilas sa final window sang FIBA Asia Cup Qualifiers subong nga Pebrero. Bisan kuwalipikado na ini sa tournament bangud sa matinlo nga record, ginagamit man ni Coach Tim Cone nga kahigayunan ang friendly matches agud nga mapreparahan ang mas dalagku nga kasumpong sa FIBA Asia Cup sa Agusto.
