Matapos ginkamasaan sang New Zealand sa hampang sang nagligad nga Huwebes kun sa diin 46 ka puntos gid ang nangin abanse, nag-resbak ang Gilas Pilipinas paagi sa paglutos sa India, 79-63, sa hampang sa Mall of Asia Arena nga amo man ang pagtakop sang first round sang 2023 FIBA World Cup Asian Qualifiers.
Nanguna si Dwight Ramos sa sambuwa matapos nakakuha sang 21 points, samtang may 11 rebounds kag five points naman si Geo Chiu.
Si Kiefer Ravena ang may yara sang 12 points samtang may 11 points naman si Will Navarro.
Matandaan nga sa nagligad nga window, gin-dismantle man sang Pilipinas ang India, 88-64.
Apisar nga 0-4 ang record, sulod sa gihapon sa second round ang India, upod ang Pilipinas kag ang New Zealand, bangud nga disqualified ang isa pa ka pungsod nga amo ang South Korea.
Makaupod sang tatlo ka pungsod ang Group C teams nga Lebanon, Saudi Arabia, kag Jordan agud magporma sang Group E.
Nahibaluan nga naka-secure na sang spot ang Pilipinas sa upcoming edition sang World Cup bangud nga maga-host ini sang tournament kaupod ang Japan kag Indonesia.
