Heads up, basketball fans!
Natalana nga mag-atubangay ang Gilas Pilipinas kag ang Taiwan Mustangs sa isa ka exhibition match sa Lunes sa Pasig City.
Suno sa Samahang Basketbol ng Pilipinas, libre lang ang paglantaw sa sini nga hampang.
Sang damlag, nagpirma sang kontrata sa Taiwan sanday anay NBA stars Dwight Howard kag DeMarcus Cousins apang indi pa maathag subong kun kabahin man sila sang friendly game.
Ini nga hampang ang kabahin sang preparasyon sang team sa kampanya sa FIBA Olympic Qualifying Tournament sa Hulyo 2-7 nga patigyunon sa Latvia. Kaupod sang Pilipinas sa Group A ang host country kag ang Georgia.
Nahibaluan nga diri na sa Pilipinas ang Gilas star nga si Justin Brownlee nga amo ang magapanguna sa team para sa tournament. Siya man ang naghakwat sang Gilas Pilipinas sa FIBA Asia Cup 2025 Qualifiers subong nga tuig nga naglutos sa Hong Kong kag Chinese Taipei.
Para sa tournament sa Latvia, makaupod sini ang PBA stalwarts nga sanday June Mar Fajardo, Chris Newsome, CJ Perez, Japeth Aguilar, Scottie Thompson, kag Calvin Oftana; paga-updan man sang international players nga sanday Kai Sotto (Koshigaya), Dwight Ramos (Hokkaido), kag Carl Tamayo (Changwon LG); kag ang amateur standouts nga sanday Kevin Quiambao (La Salle) kag Mason Amos (Ateneo).
Indi makahampang sanday Jamie Malonzo kag AJ Edu bangud sa ila injuries.
Natalana man ang friendly games sang pungsod batok sa Turkey sa Hunyo 27 kag batok saPoland sa Hunyo 29.
