Nakuha sang Gilas Pilipinas ang kadalag-an batok sa Iran sa Mens Basketball Team sa FIBA Basketball World Cup Asian Qualifiers sa score nga 68-56.
Ginpangunahan ni Juan Gomez de Liano, Dwight Ramos, kag June Mar Fajardo ang second quarter rason nga nakabawi ang mga ini halin sa ila medyo mahina nga umpisa.
Dako man ang nabulig ni Kai Sotto paagi sa iya 13 points kag 16 rebounds amo man ni Aj Edu nga may 8 points kag 8 rebounds.
Ini nga paglutos sa Iran ang yabi sang Gilas agud makasulod sa Window 4 sang FIBA World Cup Asian Qualifiers.
Importante man ang ini nga kadalag-an bangud mangin dako ang tsansa sang Pilipinas nga makasulod sa top three sang Group E kag makuha ang awtomatiko nga puwesto sa masunod nga FIBA World Cup.
Sa matandaan nga bag-o ang ini nga hampang, nagdaog man ang Gilas batok sa Jordan sa score nga 82-81 Sa Round 2 opener sang 2027 FIBA Basketball World Cup Asian Qualifiers sang nagligad nga Agusto 28.
Ginkumpirma na ni Gilas Pilipinas star June Mar Fajardo nga maga-retiro na ini sa paghampang sa national team.
Suno kay Fajardo, ang ila nga hampang sang Gilas Pilipinas batok sa Iran kagab-i amo na ang iya katapusan nga pagsuksok sang uniporme sang Gilas.
Nahibaluan nga halin pa sang tuig 2013, kabahin na si Fajardo sang Gilas Pilipinas kun sa diin si Chot Reyes pa ang head coach sini.
Sa iya katapusan nga hampang, nakakuha si Fajardo sang 6 points kag duha ka rebounds sa sulod sang 7 minutes.
Nahibaluan nga si Fajardo isa ka nine-time Most Valuable Player sang PBA.
Nagpasalamat man si Fajardo sa iya mga fans nga naghatag sang pagsalig kag padayon nga nagasuporta sa iya paghampang para sa Gilas Pilipinas.
