Ginakabig nga top 7 nga makamamatay nga cancer sa bilog nga kalibutan amo ang liver cancer.
Sa interview sang Bombo Radyo kay Dr. Elvin Tiangha, iya ginpahayag nga cancer sa atay amo ang resulta sang pagdako sang mga hepatic cells sa lawas sang tawo nga nagatuga sang tumor.
Suno kay Dr. Tiangha, pila sa mga sintomas ang liver cancer amo ang masunod:
- Gilayon nga pagniwang kag pagkadula sang gana sa pagkaon
- Sakit sang tiyan kag masami nga pagsuka
- Pagpangluya sang lawas
- Jaundice ukon pag-yellow sang duag sang panit kag mga mata kag
- Maitom nga ihi
Ang pagbulong naman sang nasambit nga balatian suno kay Tiangha, amo ang pagpatigayon sang operasyon agud kuhaon ang tumor sa atay pinaagi sa liver transplant.
Pahayag sang doktor, mahimo pilian sang pasyente agud nga makapabulong amo ang chemotherapy, immunotherapy, kag radiation therapy.
Agud makalikaw sa liver cancer, nagakadapat nga hibaluon ang health status sang partner bag-o makighilawas, likawan ang mga mapait nga pagkaon, pag-inom sang alcohol, kag untatan ang pagpanigarilyo.
Importante man suno sa doktor ang pag-angkon sang healthy lifestyle pinaagi sa diet kag exercise.
Nahibaluan nga subong nga bulan sang Enero amo ang Liver Cancer and Viral Hepatitis Awareness and Prevention Month.
