Nagdangat sa 3.06 milyon US Dollar ang balor sang ube kag mga produkto nga himo sa ube nga na-export halin sa Pilipinas sang 2025, bangud sa mataas nga global demand sa natural nga pagkaon, Asian flavors, kag iban pa nga gamit sa pagkaon.
Suno sa Department of Trade and Industry (DTI), nag-umwad ang export sang processed ube pareho sang powder, puree, halaya, kag flavor extracts, kun sa diin nagapanguna ang merkado sang Middle East, Estados Unidos, United Kingdom, kag Italy.
Maobserbaran man ang mataas nga interes sang mga foreign companies sa paggamit sang ube sa ice cream, baked goods, confectionery, specialty beverages, kag mga ready-to-eat desserts.
Paathag ni DTI Secretary Cristina Roque nga ginapakita sang pag-export sang ube ang kapasidad sang pungsod nga himuon nga value-added kag competitive ang tradisyonal nga produkto nga agrikultura, kag nagahatag ini sang oportunidad sa mga Filipino exporters kag mangunguma.
Ginpabaskog sang DTI ang suporta sa sektor paagi sa pagpaayo sang kalidad, pagpabakod sang supply chains, kag bulig sa marketing agud masiguro ang sustainable nga kompetisyon sa international market.
