Nagwangal ang pamilya sang mag-iloy nga nasapwan patay bangud sa ginapahayag mahinay nga pagresponde sang Leganes, Fire Station sa nagluntad nga sunog sa San Vicente Subdivision, Barangay Poblacion, Leganes, Iloilo.
Ang mag-iloy amo sanday Ana Vivien Ganon, 49 kag anak sini nga si Anthony Quin Ganon, 21.
Sa interview sang Bombo Radyo kay William Mijares, bilas ni Ana, iya ginpahayag nga kun nakaresponde gilayon ang bombero nga malapit man lang sa ila nga lugar, posible natabangan pa ang kabuhi sang ila mga himata.
Suno kay Mijares, ginabasol naman ni Andrew Vince Ganon, 16 anyos kag ikaduha nga anak ni Ana nga nakalumpat pa sa ila nga balay, ang iya kaugalingon bangud wala niya maluwas ang iya utod kag iloy.
Sa subong, padayon man ini nga ginabulong sa ospital.
Panawagan ni Mijares, kuntani mas mangin madasig pa sa sunod ang pagresponde sang Leganes, Fire Station.
Samtang, nagdepensa naman ang Leganes Fire Station sa ginapahayag madugay nila nga pagresponde sa sunog nga nagluntad sa San Vicente Subdivision, Barangay Poblacion, Leganes, Iloilo.
Sa interview sang Bombo Radyo kay Senior Fire Officer 4 Le Sampiano, supervisor sang Leganes Fire Station, iya ginpahayag nga la 1:08 sang kaagahon ang ‘time of call’ ukon ang oras nga ginpahibalo sila sang isa ka traysikol driver natuhoy sa natabo nga sunog sa nasambit nga lugar.
Suno kay Sampiano, la 1:09 sang kaagahon sang gilayon sila nga nakaabot sa lugar sa diin gintupok na sang kalayo ang ikaduha nga panalgan sang balay.
Ginabanta nagdangat naman sa kapin P 700,000 ang balor sang nagkalaupos nga propedad.
