Ginkadismaya sang National Union of Students of the Philippines (NUSP)–Panay ang desisyon sang Iloilo City Government sa pag-kanselar sang klase sa tanan nga lebel sa sulod sang tatlo ka adlaw bangud sa patigayunon nga ASEAN meetings sa syudad sang Iloilo nga maga-umpisa bwas nga adlaw Pebrero 25 tubtob 27.
Sa interview sang Bombo Radyo kay Matthew Gonzaga, Regional Coordinator sang National Union of Students of the Philippines NUSP-Panay, nagpahayag ini sang pagkabalaka bangud apisar nga iswitch ini sa online learning ginataya naman diri ang kalidad sang pagtuon sang mga estudyante.
Suno kay Gonzaga, bilang isa ka estudyante, naga-upod man sila sa panawagan nga indi pagdayunon ang LPTRP ukon Local Public Transport Route Plan nga nagaresulta sa pag-phase out sang pila ka public utility vehicles.
Ginpahayag sini nga sa baylo nga magkanselar sang klase, mas maayo nga i-review sang city government ang mga polisa nga may kaangtanan sa transportasyon kag trapiko nga problema sang syudad.
Para sa grupo, indi dapat pagtakpan ang matuod nga problema sa trapiko nga ginapangatubang sa syudad paagi sa pagkanselar sang klase.
Ginakabig man sang mga ini nga “anti-student” ang ini nga polisa nga nagaapekto direkta sa pag-eskwela sang kabataan.
