ILOILO CITY- Ginalantaw sang otoridad ang posibilidad nga wala pa sang direct contact gid ukon parokyano ang ginaalegar durugista nga napatay matapos nagbato sa otoridad sa buy bust operation sa Barangay Sapao, Dumangas, Iloilo.
Ang napatay amo si Gerald Joseph Ruben Gelario, residente sang Brgy. Buray, Oton, Iloilo.
Sa interview sang Bombo Radyo kay PMaj Ken Albert Lepsia, hepe sang Dumangas Municipal Police Station, iya ginpahayag nga ini ang ila inisyal nga konklusyon base sa mga na-recover nga bulto sang shabu nga may mga label sang banwa kaangay sang Pototan, Mina kag Janiuay samtang ang iban nga sachet ang wala naman sang label.
Suno kay Lepsia, antes ang transaksyon ni Gelario sa police poseur buyer, posible nga madamo pa ini sang lugar nga padulungan para mag-deliver sang illegal drugs apang natabuan nga ang una sini nga na-transact amo ang myembro sang operatiba.
Matandaan nga nagdangat sa P2.5 million ang balor sang illegal nga droga nga nakuha sa posisyon sang subject.
