Nagbalik sa spotlight si Department of Health (DOH) Secretary Francisco Duque III matapos nadalahig sa naga-init nga away sa tunga nanday Presidente Rodrigo Duterte kag Senator Manny Pacquiao.
Sanday Duterte kag Pacquiao ang yara sa idalom sangisa lang ka partido — ang Partido Demokratiko Pilipino–Lakas ng Bayan ukon PDP–Laban kun sa diin chairman si Duterte kag presidente naman si Pacquiao.
Sa sabtanay sang duha ka opisyal nga wala man ginlipod sa publiko, una nga namensyonar ang pangalan ni Duque.
Ini matapos ginhangkat ni Duterte si Pacquiao nga paggwaon ang pangalan sang mga kurap nga opisyal sa idalom sang Duterte Administration.
Sa statement ni Pacquiao nga ginpagwa kahapon sang hapon, una nga gintudlo sini si Duque kag ginpamangkot kun handa ini nga ipakita ang kabug-usan nga gingasto para sa mga medical equipment kag kun diin nagkadto ang kwarta para sa COVID-19 pandemic response.
Sunod man nga nagpagwa sang statement si Duque agud sabton ang alegasyon ni Pacquiao.
Suno sa tiglikom, handa siya nga ipaidalom ang DOH sa isa pa ka round sang auditing agud nga mapamatud-an nga wala sang basehan ang alegasyon sa kurapsyon.
Suno pa kay Duque, wala direkta nga nagakadto sa DOH ang kwarta halin sa funding agencies.
Ginpahayag pa ni Duque nga may mga report sila nga ginsumite sa Senado kag iban pa nga concerned government agencies may kaangtanan sa pagbakal sang personal protective equipment kag sa ginapahayag nga overpriced test kits.
Matandaan nga indi ini ang una nga kahigayunan nga nagpangatubang ang DOH sang mga alegasyon sa kurapsyon.
Sang Septyembre sang 2020, nagrekomenda man ang Senado nga pasakaan sang kaso nga malversation kag graft si Duque kag iban pa nga opisyal bangud sang lapnagon nga corruption sa Philippine Health Insurance Corporation (PhilHealth).
