ILOILO CITY – Wala mauyunan sang presidente sang kolehiyo kun sa diin ang kontrobersiyal nga scholarship program ni anay Iloilo Fifth District Rep. Niel Tupas Jr., ang pagpasaka sang kaso batok sa iya may kaangtanan sa ginapahayag nga anomalya.
Sa interview sang Bombo Radyo Iloilo, ginpanindugan ni Dr. Ma. Theresa Palmares, presidente sang Northern Iloilo Polytechnic State College (NIPSC), nga wala ini sang kahilabtanan sa ginapahayag kapin P75 million nga wala ginbayaran ni Tupas sa scholarship program.
Nahibaluan nga wala ginhatag sang buluthuan ang Transcript of Records kag iban pa nga credentials sang mga iskolar bangud sang wala mabayaran nga kantidad, rason nga ginpasakaan ini sang kaso.
Naglain man ang buot ni Palmares nga gintawag siya ni Tupas nga unscropolous kag corrupt.
Suno kay Palmares, kun ginbayaran ni Tupas ang scholarship program, indi na maglab-ot sa amo sini ang sitwasyon.
Gindangop na sang Northern Iloilo Polytechnic State College ang isyu sa Office of the Solicitor General kag sa Commission on Higher Education.
Sa interview sang Bombo Radyo, gintawag man ni Tupas ang college president nga butigon kag nagpanindugan nga nabayaran na sang iya Priority Development Assistance Fund (PDAF) ang scholarship program.
Dugang pa nga kaso suno kay Tupas ang iya ipasaka batok kay Dr. Palmares.