Nadakpan sang mga pulis ang gina-alegar nga suspek sa pagluthang-patay kay anay Punong Barangay Ernie Poral sang Barangay Ingore, La Paz, Iloilo City.
Natabo ang krimen kahapon sang aga, Agusto 5, sa Barangay Baldoza sa La Paz samtang nadakpan naman ang ginatudlo nga suspek sa kilid sang dalan sa Barangay Girado‑Magsaysay, Guimbal kagab-i.
Ang gin-aresto amo si Nilo Guardaya, 39, kag ang kaupod sini kagab-i nga si Jerson Gentapao, 35, lunsay mga residente sang Barangay Igcocolo sa amo nga banwa. Nakuha sa ila possession ang isa ka home-made shotgun, iligal nga droga, kag motorsiklo.
Kagab-i, gindala man ang mga suspek sa La Paz police station kag natalana nga ipaatubang sa nakasaksi sa krimen, ipaidalom sa drug test, kag amo man sa paraffin test.
Ang nagpatigayon sang operasyon amo ang gintingob nga pwersa sang Iloilo Police Provincial Office (IPPO), Guimbal Municipal Police Station, kag Iloilo City Police Office (ICPO).
Base sa inisyal nga mga impormasyon, natultulan si Guardaya bangud may rekord ini sa Police Station 1 kasunod sang involvement sini sa shooting incident sa Brgy. Villa Anita, Iloilo City Proper sang Marso 17, 2024 kag ginapahayag nga nagasanto man ang description sang testigo sa suspek.
May mga impormasyon man nga nakit-an ini sa La Paz Public Market kasunod sang hitabo sa Barangay Baldoza kahapon.
Apang hugot nga nagapanginwala ang suspek nga nakakadto ini sa La Paz bangud base sa istorya sini, wala siya nakahalin sa Guimbal kag makapamatuod ang iya pamilya kag mga kasilingan suno sa iya nga masako ini sa pagpasarahe sang kahoy.
Base sa istorya sini, ginpanaugan lang siya sang pulis sa dalan kagab-i, gindakop kag ginhambalan nga siya ang suspek sa pagpatay kay Poral.
Ginkumpirma naman sang Guimbal Municipal Police Station nga wala sang police record si Guardaya sa ila nga estasyon.
REAKSYON SANG PAMILYA
Gin-abi-abi naman sang pamilya ang madasig nga development kasunod sang pagpatay kay Poral.
Sa interview sang Bombo Radyo kay anay Ingore Punong Barangay Edwin Poral nga magulang sang biktima, iya ginpahayag nga indi siya pamilyar sa duha bangud mga tumandok ini sang Guimbal.
Pahayag sini, base sa iya nakita sa CCTV footage, nagasanto man ang panglakat kag panglawason ni Guardaya sa suspek nga nagtiro sa iya nga utod. Lain nga motorsiklo ang gamit ni Guardaya sang nadakpan sa Guimbal ipaanggid sa motorsiklo nga nakit-an nga gingamit sa Baldoza.
“Kun ikaw abi ang nagtiro, madala ka pa gihapon sang motor nga gingamit mo (sa krimen)? Siyempre, islan mo,” suno sa magulang nga Poral.
Nagapati man ini nga may nagsugo lang sa mga nadakpan nga ginaalegar nga suspek.
“Laban-laban mahimo na bala sang taga-Guimbal kay taga-Ingore kami ya? Ano na bi labot nila sa amon? Kun may nagsugo man… kun indi ka makasabat sa korte, sa atubang sang Diyos, sabton mo gid na ya,” dugang sini.
Plano sang pamilya nga ipaidalom sa autopsy ang bangkay ni Kap Ernie subong nga Martes, Agusto 6.#
